Pro_Ed Akademie se groot dag het aangebreek toe mnr. Christian Grobler die  eerste manlike skoolhoof die week hier verwelkom is. (geen  wantrouemosie in die  vroulike voorgangers nie!)
Vrydagaand  is hy op ‘n pragtige geselligheid  by die skool aan die ouergemeenskap sowel as die publiek bekend gestel.  ‘n  Mooi  musiekspel  is deur die  leerders aangebied en daarna  is die gaste getrakteer op ‘n smullekker ete.  Mnr Hennie Verwey,   wat  ‘n reuseaandeel gehad het in die totstandkoming  en bestuur van die Afrikaanse onafhanklike skool oor die afgelope  anderhalf dekade, het ,mnr Grobler voorgestel en dis duidelik dat die skoolgemeenskap baie dankbaar is vir  die voorreg om  oor die diens van so ‘n  ervare opvoedkundige  te beskik.
Mnr Grobler was die afgelope drie jaar verbonde aan die  Moria onafhanklike skool by Outjo.  Hy is ‘n persoon  met goeie ervaring en die toekoms van onderwys is vir hom duidelik  ‘n roeping en nie net ‘n werk nie.  Die veilige begeleiding van ons kinders is vir hom  die leidster in sy lewe.
Pro-Ed Akademie huisves tans 47  leerders.  Hulle neem gereeld aan sport deel saam met ander onafhanklike skole,  en hulle vaar goed.  Private onderrig in musiek en kuns is beskikbaar .
Onafhanklike skole is  by die ouers baie belangrik en in gesprekke met PLUS was dit duidelik dat hulle die beginsel  beskou as  lewensnoodsaaklik om gehalte-onderwys te beding.  Die gemeenskap sal in die toekoms redelik baie  herstrukturering van die  leefwyse en die opvoeding moet doen want dis duidelik dat goeie beplanning van onderwys noodsaaklik is en daarby sal ook aandag gegee moet word aan die beskikbaarheid van gehalte onderwysers.  Selfs al lei dit tot die opleiding van  onderwysers, sal  dit beslis nog ‘n aspek van onderwys wees waaraan die ouers sal moet aandag gee.
Goeie wense vergesel Christian Grobler  vir sy betrokkenheid by Pro-Ed

Hennie Verwey en die nuwe skoolhoof, Christian Grobler